سامح
....
ما الزمن بيدوُر
ويلقاك في مدالق الهم
يشاور ليك
بلهفة عظيمة
زي مشروق
كأنك ما الأباكا قبيل
كأنك كنت ليهو
العاشق المعشوق....
وزي ما كنت بتدي
ح تدي
عطاك ماهل وفايت الحد
وتطويو دفتر الماضي
زمن ما صابك إلا الصد
وح تسامح
*
غريب عن وطنو
وانت غريب
دعاك لي شجنو
حقو تجيب
وخللي الرؤيا تتآلف
وحزنك سيبا شمسو تغيب
دي افراحك هنا والآن
غنيوات سادرة في التطريب
وما أنبل إذا تسامح!
*
عمايل الغربة
في زولآ نساك ناكر
تحنن قلبك العامر
يضاريه الأسف واللوم
وتطلع من عذابك يوم
من الزمن الخِتا
وعدا
وتغفر انت وتسامح
تغفر..
ما الزمن بيدور
وأتاريك في زمن تاني
كأنك ما الأباكا قبيل
وزي ما كنت بتدي
ح تدي
وح تسامح
!كمان بالحيل
